قصيدة ولا في الاحلام /// حب غزة

الغرام في الدم سارح
و الهوى طارح معزه
و الحنين للقرب بارح
و النوى جارح يا غزه
يا ابتسامه فجر هلت
بددت ليلي الحزين
يا ندى الصبح اللي سأسأ
فوق خدودي الدبلانين بل شوقهم
صحى لون الورد فوقهم
كل خد شم ورده
مين يدوقهم غيرك انتي
و مين سواكى يا حياتي يا ملاكي
يا نسيم الحب لما هب هز القلب هزه
يا هوي الأحلام يا غزه

الليلادي جوة بيتى يا ملاكي
جوز تنابله و نص دسته من التيران
كنت باحلم يا حبيبتي
كنت باحلم بيكي انتي
كنا قال انا و انتي قال
في جنينه خضرا
و محاوطها البرتقال

و انتي جوه قرنفلايه
بالعبير بتستحمي
اجري ليكى يا هوايا و تجري ليا
احضنك و اشرب عبيرك

و الغصون واقفه و شايفه
بتراعينا بس خايفه م العيون
و العيون بتقول كلام
و الكلام طاير حمام
بينادينا بالأغاني
و يهادينا بالسلام
كنت باحلم يا حبيبتي
و انطلق في الفجر فجأه صوت يخلى الدم يجمد
وصحانى بخضة
و انتهى الحلم الجميل
و ابتدا الهم التقيل

انتوا مين
احنا ناس مكلفين

لاانتوا دود الأرض و الأفه المخيفه
انتوا ذره رمل في عيون الخليقة
انتوا كرباج المظالم و المآسي
انتوا عله في جسم بلدي
انتوا جيفه
-سكتوه ابن الكلاب
سففوه من التراب ***
فتشوا كل الأماكن
طلعوا رفوف الدولاب

كمموني يا حبيبتي
كتفوني يا حبيبتي
قوموني قعدوني
كل شعره في جسمي بالعين فتشوها
المخده من جنانهم شرحوها
و انتهى التفتيش مافيش
صدقيني ما تخافيش
هو في يا غزه عندي ممنوعات
غير حبك ودة عندهم ممنوعات

***
بص واحد م التنابله
جوا عيني
و انتي عارفه
عنيه صافيه زي كل عيون بلدنا يا حبيبتي
شباكين ع القلب دوغري موصلين
***
كان مناه يلمح علامه خوف بسيطه طب حاييجي الخوف منين ياابن العبيطه
هو مين فينا الجبان ولا مين فينا اللي خان
اللي قــلبه بالمحبه و بالأماني
بالربيع لاخضر مزهر و الأغاني
ولا كلب الصيد و اسياده الأباطره
اكالين لحم البشر فوق الصواني
هو مين فينا الجبان ولا مين فينا اللي خان
هو بص في عيني بصه ارتجف و في حلقه غصه
و اتعوج و مال وقال
جملتين مش مفهومين
اصله شاف صورة ياسين
وشاف في العيون الطيبين
مصر في العين الشمال
و انتي يا غزة فى العين اليمين

جمييييييييلة جدا اللهم انصر غزة
غزة في العيون نفنى و لا تهون
[ندعوك للتسجيل في المنتدى أو التعريف بنفسك لمعاينة هذه الصورة]

دقمة في الابداع اللهم انصر اخواننا في غزة [ندعوك للتسجيل في المنتدى أو التعريف بنفسك لمعاينة هذه الصورة]